Dipolog City – Pabilin pang mising ning panahona ang usa ka ulitawo nga gikatahong nalumos samtang naligo kini sa dagat, kilid sa pantalan sa may barangay Galas ning dakbayan sa Dipolog, taliwa sa dili maayong kahimtang sa panahon gumikan sa paghaguros sa bagyong Paolo hinongdan sa dagko ang balod niadtong adlaw sabado sa buntag.
Tulo na ka adlaw karon gipangita sa personahe sa Philippine Cost Guard uban sa mga rescuer diha kadagatan ang biktima nga si Moises Erat Jr alias “Jan Jan” 19 anyos, lumulupyo sa relocation site barangay Upper Dicayas ning dakbayan.
Sa interview sa rmn dxdr ngadto sa inahan nga si Sely Erat nibutyag nga wala pa gihapon narekober ang lawas sa iyang anak nga gihulagway ang timailhan niini nakasuot ug boxer short kolor yellow green dunay arites ang duha ka dalungan ug igo lang ang gidak-on ang panglawas, itom ang buhok.
Gituhoan niini nga gianod na sa may barangay Sicayab paingon sa kadagatan sa dakbayan sa Dapitan ang lawas sa anak.
Nanawagan sab sa katahawhan ang maong inahan nga nanimuyo daplin sa kabaybayonan nga kon aduna silay makit-an patay lawas sa ilang lugar gidayon ipahibalo sa buhatan sa kapolisan o kaha sa mga barangay official sa ilang dapit. (-r.m-)
