Davao City – Maayong pagkahiwa sa tuong bukton sa usa ka ulitawo human gitigbas kini sa iyang hinigugma gamit ang mahait nga butang natigayon alas-5:45 sa hapon didto sa Purok Sta. Cruz, Brgy. Aquino siyudad sa Davao.
Sa report gikan Sta. Ana PNP, naila ang biktima nga usa ka Rogelio Sangre, 35 anyos, usa ka auto technician samtang ang suspect ang iyang girlfriend nailang si Irene Solis, hingkod ang edad, pariho nagpuyo sa Sitio Relocation, Brgy. Panacan ning siyudad.
Matud pa samtang anaa ang biktima sulod sa iyang boarding house sa nahisgutang lugar, kalit niabot ang iyang hinigugma diin matud pa nagkalalis ang duha ug wala kabantay ang biktima diin kalit gitigbas ang iyang tuong bukton nga resulta sa pagkasamad.
Human sa panghitabo igo nalang sa pagdangop sa presinto uno si Sangre aron matala ang gihimo sa iyang hinigugma.
Sa gihimong imbestigasyon sa kapolisan, gituohan nga pagpanelos ang motibo sa gihimo sa iyang hinigugma apan sa karon wala pay plano mupasaka og kaso ang biktima batok iyang hinigugma.
RadyoMaN Don Pulayao
