Davao City – Mas palawman pa sa Buhangin PNP ang ilang imbestigasyon aron masuta kung duna ba’y foul play ang kamatayon sa usa ka ulitawong guwang kinsa nakaplagang wala nay kinabuhi sa bakanteng luna sa usa ka subdivision sa Buhangin area alas-7:00 Martes sa buntag.
Sumala ni SPO2 Ruben Corsino, aduna matud pa’y garas ang siko ug samad sa tutonlan sa biktima nga si Ariel Balboina, 53 anyos, ulitawo, ug nagpuyo sa Roseville Subdivision, Lanang ning siyudad busa nagduda ang imbestigador nga basin gituyo ang kamatayon sa biktima.
Ug tungod niini, gikatakda nga ipailawom sa otopsiya ang patay’ng lawas kinsa anaa na karon sa punerarya.
Gisulti sa bayaw nga si Antonio Calo, Jr., dependent matud pa sa bino ang biktima tungod sa gihambin nga balatian niini.
Apan ang dakong pangutana sa kapulisan kung ngano miabot sa NHA Buhangin ang biktima kung asa na kini nakitang patay.
RadyoMaN Joel Viray
