Davao City – Priso sa Buhangin Police Station ang usa ka alyas Junjun, 22 anyos, delivery boy, ug nagpuyo sa El Rio Subd., ning syudad human namugos nga makighilawas sa iyang kanhing uyab nga si alyas Inday.
Matud ni Wilma Villamia, Barangay Coordinator sa Barangay Cabantian, iyang naaktohan ang pagbitad ug pagpanagpa sa suspek ngadto sa iyang kanhing uyab nga nahitabo sa Lower Cabantian alas 3:00 sa kadlawon.
Nasuko matud pa si alyas Junjun kay nagmagahi mu-uban kaniya ang iyang ex-girlfriend sa dapit aron didto makighilawas diin gibaharan pa sa ulitawo nga kung dili mosugot, iyahang i-post ang ilang sex video kaniadto.
Matud ni Wilma, isog kaayong miatubang kaniya ang ulitawo ug nanghambog pa kini nga pulis ang iyang agalon ug namatikdang naka-inum ang suspetsado.
Tungod niini napugos ang Barangay Coordinator ug mga Barangay Tanud sa pagdakop sa suspek ug gi-endorso sa kapulisan apan hugot gihimakak niini ang tanang pasangil batok kaniya diin depensa niini nga ang iyang ex-gf maoy gusto makigkita kaniya aron manghiram og kwarta hangtud nagkasabot sila nga mag-inom una.
Bisan og nangayo nagpasaylo ang suspek sa Barangay Coordinator ug kang alyas Inday, gipapriso gihapon kini ug kasohan aron motagam.
RadyoMaN Joel Viray
