Detinado ang 22 anyos nga ulitawo human makasupak sa COMELEC gun ban dihang nakuhaan sa 11 inches nga gitas-on sa kutsilyo alas 3 sa buntag niadtong Marso 6 sa dalang JR Borja Guillermo ning siyudad.
Suspek nailang si Vincent Salvaleon nga taga Alco Zone 8, Carmen kinsa gitudlo ni Orly Borres, 25 anyos, ulitawo nga taga Talisayan, Misamis Oriental nga maoy mikawat sa Vivo cellphone nga nagkantidad sa 8 mil pesos nga gipanag-iyahan sa iyang uyab.
Nakaikyas sa maong hitabo ang laing tulo ka kauban ni Salvaleon dala ang cellphone nga ilang gikawat ug kutsilyo nalang ang nakuha sa posisyon niini dihang gikapkapan sa operatiba sa Police Station Cogon nga giunhan ni PEMS Jose Rene Rabosa.
Sa karon, giandam na ang kasong ipasaka batok sa suspek samtang padayon ang gihimong imbistigasyon sa PS2 investigator pinaagi ni PSMS Neil Apollo Delas Alas.
