Un suspechao Abu Sayyaf que ya escapa na preso y dos mga suspechao carnappers el ya fuede aresta el military na dos separao operasyon na provincial de Basilan.
El mga tropa del 74th Infantry Battalion ya fuede aresta con el bandido si Boy Indama ciudad de Lamitan del anti-ayer. Si Indama uno del mga siguidores de Puruji Indama quien ya escapa na Basilan Provincial Jail del Deciembre 13, 2009. Ele chene el pendiente mandamiento de aresto por el caso de kidnapping y serious illegal detention na Barangay Magcawa, Al-Barka, Basilan. Con indama insiguidas ya man turn-over na custodia del Lamitan Police Station por el detensyon.
Mientras tanto, el mga tropa del 4th Special Forces Battalion ya fuede cuji dos suspechao carnappers na diila checkpoint na vicinidad del Barangay Cabunbata, Isabela City del pasao dia.
Con el mga suspechao ya identifica como canda Salam Aslatan y Nuruddin Duray, de Tipo-Tipo,Basilan. Canila ta ensenya el mga testigo que amo ya anda ruba con el motorsiclo que ta duenya si Mursin Halikin, residente de Tipo-Tipo. Cuando yah ace follow-up el otoridad, ya ensenya sila onde sila ya lleva esconde con el yan carnap motorsiclo, donde canila tambien ya man turn-over na custodia del Isabela Police Station por el formal plantada de caso na korte y detensyon na karsel. – *Bhong Simbajon/RMN News*
