Ciudad de Zamboanga- Solamente semento ya lang del istructura del casa el ya resta despues quema el un residencia que ta duenia el familia Alamia, locao na Baliwasan Tabuk en este ciudad alas 6:59 este noche.
Durante el cubrida del RMN ZAMBOANGA con el incidente, uno del maga testigo si Pablo Francisnco el ya habla que ya principia el fuego na primer piso del dos andana casa etcho de concreto y despues ensiguidas este ya man kalayat na entero casa y ya man umit pa el un truck y otro vehiculo.
Por suerte salavao ya puede sale na casa el man nana’y anak y un subrina quien akel tiempo ya queda na casa pero ya sustene segun quemadura el nana cuando ya precura le salva con dos maga bata.
Nohay mas otro residencia el ya sale cumbe siendo alto el pader del mencionao residencia, y ya salva tambien an fuego el bodega adentro del mismo compound despues que ensiguidas ya puede responde el maga bumbero.
Na inicial imbestigacion del bumbero posible que na linya del corriente ya principia el fuego, como cosa ta alega el duenio del casa, pero con este ta precura pa verifica el maga bumbero lomismo si cuanto el destroso.
