UN drug probe may basihan

17

Davao City – Walay nakita nga sayop ang Alliance for Nationalism and Democracy (ANAD) sa pagahimoon nga imbestigasyon sa United Nations Human Rights Council (UNHRC) sa ‘war on drugs’ sa gobyerno sa Pilipinas.

Matud ni kanhi ANAD Partylist Representative Jun Alcover, kun walay gitago si Pres. Rodrigo Duterte, dili kini angay mahadlok sa imbestigasyon sa UNHRC kalabutan sa mga hitabong patay sa diha sa controversial Philippine drug war.


Segun ni Alcover, sakop sa UN ang Pilipinas gani founding member kini busa angay lamang nga mutugot ang gobyerno nga maka-imbestiga ang UNHRC o dili ba kaha mag-withdraw na lang sa membership kung dili kini buot magpahilabot sa ongoing anti-drug campaign ug sa gi-alegar nga extra judicial killings kun EJKs.

Sa maong pamaagi, mugawas ang kamatooran kung gituyo ba gayod sa mga pulis og patay ang mga nalambigit sa droga atol sa ilang anti-drug operations ug kung nisugo ba sa kagamhanan ang mga riding-in-tandem.

Sa pikas bahin, gibutyag ni Gabriela Partylist Representative Emie De Jesus nga may basehan gayud ang UNHRC aron imbestigahan ang gobyerno sa Pilipinas tungod sa abuso ug EJK sa drug war campaign.

Bug-at ang mga ebidinsiya nga gi-sumite ngadto sa UN aron mutindog ang kaso nga magduot kang Duterte diha sa nagpadayon nga pagpang-abusar sa tawhanong katungod sa mga nakabsan sa kinabuhi atol sa gi-kwestion nga drug war.

Dugang ni De Jesus nga gikinahanglang ipursige gayod sa UN ang imbestigasyon niini aron matuldukan na ang ilang gihulagway nga pagka-arogante ni Duterte ngadto sa mga taga-United Nations sama ni Agnes Callamard, usaka French human rights expert ug Special Rapporteur on extrajudicial, summary or arbitrary executions ilawom sa Office of the United Nations High Commissioner for Human Rights.

Malaumon ang magbabalaud nga makab-ot na sa mga biktima ug sa mga kabanay sa extra judicial killings ang hustisya karon nga mi-entra na ang UNHRC sa mga nahitabong kamatay dinhi sa Pilipinas.

RadyoMaN Joel Viray

Facebook Comments

From Advertisers