Arestao el un pulis quien imbuelto na un incidente de tiro enantes madrogada na Unity Drive,Barangay Tetuan.
Con PO1 Alden Sahirun, designao na RPHAO del PRO9, ya fuede alcansa canda Supt.Hadjiri Langgal mientras ta corre y armao del calibre 45 na camino y ta escapa na lugar donde ta socede el engcuentro.
Junto conele ya fuede tambien aresta con cuatro pa del su mga cumpañero quien amo responsable na atake na residencia del familia Ibañez na Tetuan.
Tres pa otro cumpañero del mga suspechao el ya fuede escapa y ta hace embuscada aura el otoridad.
Si Supt. Langgal ya abla na entrevista del RMN enantes aga cay ta pricura pa sila determina si cosa el motivo del mga suspechao porque sila ya man-harrass con el residencia del familia Ibañez.
Amediante del tirahan muerto on the spot el uno del mga suspechao mientras irido tambien el padre de familia si Bernard Ibañez.
El SOCO del policia ta imbestiga pa este momento el mensyonao crimen.- Bhong Simbajon/RMN News
