Ya reporta el policia local que ya esta pacifico el comemoracion del Todos Los Santos y Las Almas aqui na entero ciudad de Zamboanga.
Na entrevista del RMN Zamboanga enantes aga con el portavos del Zamboanga City Police Office (ZCPO) Senior Inspector Shellamie Chang, ele ya abla cay cuento’y buracheriyas, juego ilegal y confiscacion del mga agudo cosas lang el ya crea destorbo na mensyonao actividad na entero fueblo.
Asegun con Chang que base na report del onse mga presinto del policia enantes aga, nuay algo soceso el ya ocuri y embuenamente man tambien el implementacion del mga regulacion lo mismo el cumplimiento del mga vivientes con el mga orden ejecutivo que ya ordena el govierno local.
Si Chang ya toma ventaja rendi tambien gracias con el mga personajes del barangay, mga radio groups y losdemas pa mga organisasyon que ya asisti con el policia y military na mantensyon del seguridad na mga sementeryo publico y privado por tres dias que ya pasa. – *Bhong Simbajon/RMN News*
