Vincenzo Sagun, Zamboanga del Sur – Wala makatilaw sa ilang kuha nga isda ang unom ka mga mananagat human kining nadakpan sa kapulisan sa lungsod sa Vincenzo Sagun niining probinsya atol sa gipahigayon nga coastal patrol sa otoridad.
Nihimo sa pagpatrolya ang tropa sa Vincenzo Sagun PNP uban ang elemento sa Provincial Mobile Force Company, sa kadagatan sa Barangay Lumbal, Vincenzo Sagun partikyular sa dapit nga giilang marine sanctuary.
Malampuson nga nadakpan ang mga mananagat nga sila si Junbee Dingal, 21-anyos, Melvin Macahi, 19 -anyos, Joel Rojas 50 -anyos, Arnold Jerusalem 44 -anyos, Marcial Timpad , 28 ug Jenifer Meparanum Kilisan 33 -anyos pulos residente sa Purok Gumamela Barangay Igat Island, Margosatubig, Zamboanga del Sur.
Nasakpan sa akto ang nahisgutang mga mananagat nga nisuod sa fish sanctuary ug didto namukot og isda.
Nakuha gikan kanila ang tulo ka kilo sa lain-aling matang sa isda, usa ka pukot ug pump boat nga ilang gisakyan.
Kalapasan sa Municipal Ordinance No. 24-2017 ang giatubang sa mga dinakpan og ang mga nakuhang gamit giturn-over sa buhatan sa Bureau of Fisheries and Aquatic Resources kun BFAR.
