Davao City – Nagpatala sa Talomo PNP ang upat ka mga biktima nga mao sila si Florida Arlas (70 anyos), taga SIR New Matina Davao City, Angelita Fernando (71 anyos), nagpuyo sa Hillside Subdivision, Davao City, Jocelyn Balisalisa (53 anyos), residente sa Catalunan Grande, Davao City, ug Elsa Salvan (62 anyos), taga Panacan, Davao City, human dili na makontak ug kalit nahanaw ang recruiter sa ilang pilgrimage sa Holy Land nasod Israel.
Sa inbistigasyon sa Talomo PNP, ang mga biktima gi-recruit ni Ana Tampos Suan nagpuyo sa GSIS Heights Matina Davao City ug staff sa Dream Fun Travel and Tours nga nahimutang sa Ascension Church Matina.
Ang mga biktima naka deposito niadtong Pebrero 17, 2017 na sa BPI BANK sa kantidad nga 352,000 ka pesos ubos sa maong travel and tour ug ang bank account nakapangalan ni Jeffry Sabando isip ilang travel package.
Gipasaligan ang mga biktima nga molarga niadtong bulan sa Abril ug nasibog sa bulan sa Oktubre hangtud nga dili na makontak ang mga suspetsado ug ulahi na nga biktima diay sila sa pagpangilad.
RadyoMaN Erin Lumosbog
