Mahayag, Zamboanga del Sur – Patay ang upat ka bata dihang nasunog ang ilang pinuy-anan alas 10:5 kagabii January 21, 2021 didto dapita sa Purok 1, Brgy. Lower Salug Daku, Mahayag, Zamboanga del Sur. Naila ang mga biktima nga sila si Gian Colanggo y Niez 9 anyos, Njay Colanggo y Niez 8 anyos, Anthon Colanggo y Niez 7 anyos og Christian Colanggo y Niez 4 anyos.
Sa inisyal nga impormasyon nasayran nga samtang anaa sa sulod sa ilang pinuy-anan ang mga nga biktima nisindi matud pa og kandila aron magamit nga suga sa ilang balay. Apan dihang nakatulog ang mga bata wala nila mapalong ang nagsiga nga kandila nga maoy hinungdan sa pag-ulbo sa sunog.
Nasayran usab, nga wala sa ilang pinuy-anan ang amahan sa mga biktima nga si Gil Albatera Colanggo, kay duna kini gitambungan nga haya samtang ang inahan sa mga bata nanginabuhi sa abroad. Padayon pa usab nga nangalap og dugang kasayuran ang DXPR Newsteam labot sa maong makasusubong panghitabo.
