Davao City- Gipadlakan sa Bureau of Internal Revenue Davao Region ang upat ka branch sa Tuna Express Kamayan Grills ning syudad karon lang hapon.
Nakalapas matud pa ang maong kan-anan sa BIR human sa wala pagdeklara niini sa 18 million pesos income niadtong tuig 2016 ug 6 milyones ka pesos karong tuiga.
Gawas sa branch niini sa Roxas gisirad-an sab ang laing tulo pa ka tindahan sa Tuna Express Kamayan Grills sa Matina, Duterte ug Artiaga human nagpagula og closure order ang BIR central Office ubos sa Oplan Kandado.
Suma ni BIR 11 Director Nuzar Balatero nga gipailawom sa surveillance ang mao nga mga tindahan sulod sa napulo ka adlaw human namonitor gumikan sa under declared sales ug taxes.
Dugang sa opisyal nga makabalik lamang sa operasyon ang maong kan-anan kung mabayran na sa tag-iya nga si Rolando Corbita ang wala pa mabayri nga buhis.
Nasayran nga mao na kini ang ikaduha nga kan-anan ang napasirad-an sa BIR 11 ilawom sa Oplan Kandado diin aduna pa’y laing duha ka food chain ang posibleng masiradohan sunod semana.
RadyoMan Joel Viray
