Upat ka mga ‘persons of interest’ ang gi-hold kagahapon sa Maigo, Lanao del Norte, human ang nahitabong pagpamusil kang kanhi Dumingag, Zamboanga del Sur, Vice Mayor Naciancino Pacalioga, nga nahitabo pasado alas-8:00 kagahapon sa buntag sa may Barangay Esperanza, Bacolod, Lanao del Norte.
Matud pa ni Senior Inspector Jake Peralta, hepe sa Maigo Municipal Police Station, upat ka mga lalaki nga sakay sa usa ka itom nga hi-lux ang gi-flagged down sa may checkpoint, pipila ka minutos human ang pagpamusil nga maoy hinungdan sa pagka-angkon og samad-pinusilan ni Pacalioga, kinsa nahimo usab kanhi nga mayor.
Sa phone interview kagahapon sa hapon kang Peralta, miingon kini nga nagpadayon pa ang pag-imbestiga sa upat busa walay pay daghang impormasyon nga ilang mahatag.
Apan human sa ilang imbestigasyon, i-turn-over nila kini ngadto Bacolod Municipal Police Station nga maoy dunay jurisdiction sa maong kaso.
Sa unang report sa kapulisan sa Provincial Police Office Lanao del Norte, gipusil si Pacalioga dihang mangihi unta kini sa may sagbutan nga bahin sa dapit dihang miabot ang wala mailang mga suspek nga sakay og motorsiklo.
Nagbiyahe ang biktima gikan sa Iligan paingon ngadto sa Zamboanga del Sur, dihang nahitabo ang insidente.
Nagpaalim na ang biktima sa usa ka pribadong tambalanan sa Iligan, samtang anaa na kini sa luwas nga kahimtang.
Kung kahinumduman nga si Pacalioga, kinsa nahimong mayor ayha napili nga bise mayor, gi-dismissed sa Office of the Ombudsman niadtong nakalabay’ng tuig tungod sa tinuyo nga wala pagbutang sa iyang mga kabtangan diha sa iyang 2011, 2012 ug 2014 nga Statement of Assets, Liabilities, and Net Worth SALNs.
Usa kini ka dokumento nga kinahanglang isumiter sa usa ka opisyal ug mga empleyado sa gobyerno sa higayon nga magsugod siya sa paglingkod ug sa pagkahuman sa iyang termino, kun ugaling pinili siya nga opisyal. I-update usab kini matag tuig.
Gikasuhan si Pacalioga og “Falsification of Official Document and Serious Dishonesty” tungod kay wala niya gideklara ang napulo niya ka yuta nga naa sa nagkalain-lain barangay sa lungsod.
