Davao City – Nakatala og mokabat sa 44 ka mga suspetsadong kaso sa leptospirosis nga dunay upat ka patay ang Department of Health –Davao Region gikan Enero hangtod Setyembre 2 karong tuiga.
Gisugilon ni DOH-XI Regional Director Dr. Annabelle Yumang nga ang syudad sa Davao ang dunay pinakataas nga kaso nga dunay 14 ka mga pasyente ug tulo ang namatay.
Gisundan kini sa Davao del Norte nga dunay 13 ka mga kaso ug walay namatay; Compostela Valley Province nga dunay 11 ka mga kaso ug usa ang patay; samtang dunay tig-usa ka kaso ang natala sa Davao del Sur ug Davao Oriental.
Gumikan usab sa sunod-sunod nga pagbaha nga nasinatian sa Rehiyon 11, gitambagan ni Yumang ang publiko ilabi na ang mga nabahaan sa kontaminadong tubig nga gilayon modangop sa pinakaduol nga health centers aron usab malikayan ang pagkahiagom sa maong balatian.
Hinuon gihatagan na sa DOH-XI og prophylaxis ang mga nabiktima sa baha ug gipaniguro nga walay kakulangon sa antibiotic medicines.
Sintomas sa maong impeksyon mao ang kalintura, grabeng sakit sa ulo, nga sagad molungtad sa 14 diyas human na-expose sa kontamindaong tubig-baha.
RadyoMaN Jason Amisola
