Pinaagi sa Inquest Proceedings, gipasaka na sa Macabalan Police station kaganinang alas dos ang takna sa hapon sa City Prosecutors office, ang kasong Rape batok sa lima ka mga estudyante sa Criminology.
Kini human ilang nadakpan ang upat sa lima ka suspek kagahapon ug kaganinang buntag nga follow-up operation.
Nasayran nga nahitabo ang pagpanglugos kagahapong adlawa sa usa ka boarding house sa Licoan St. ning syudad.
Apan wala na gibutyag ni Police Master Sargent Ricky Bagas, ang deputy chief sa Macabalan Police station ang pangalan sa babayeng biktima ug ang ngalan sa lima ka mga suspek.
Hinuon, iyang gikompirmar nga pulos estudyante sa Criminology ang mga suspek ug biktima.
Dugang pa ni Bagas nga ilang nadakpan ang upat sa lima ka suspek, dihang dunay usa ka residente sa dalan Licoan ning dakbayan ang mi-report sa ilang Police station kagahapon ug misulting adunay babayeng nangayog tabang sa usa ka boarding house sa dalan Licoan.
Apan subo nga ang usa ka suspek nakasibat ug padayon karong gipangita sa kapolisan.
Nasayran nga mitambong ang 21 anyos nga dalaga sa Debut, sa usa sa lima ka suspek sa maong boarding house sa Licoan apan wala niini damha ang panghitabo.
Matud pa ni Bagas nga hugtanon usab nga gilimod sa mga suspek ang maong insidente.
