Mambusao,Capiz – Duha ka kaso nga murder kag frustrated murder ang paga-atubangon ni Rogelio Salaya, suspek sa pagpangbuno sa tatlo ka mga persona sa Poblacion Proper, Mambusao, Capiz sadtong Nobyembre 18, 2017 alas 10:00 sang gab-i.
Sa madumduman nga duha ang mga napatay sa mga biktima nga ginkilala nga Nildo Llabore 42-anyos sang Poblacion, Mambusao kag Aiza Isuma sang Barangay Manibad, Mambusao, Capiz. Samtang ginbulong naman sa St. Anthony College Hospital ang 15-anyos nga menor de edad nga manghod sang napatay nga si Aiza.
Base sa imbestigasyon sang mga kapulisan, ginapilit sang suspek nga si Salaya nga kuhaon ang sim card sang kahagugma, apang wala ini ginhatag sa iya.Naakig ang suspek kag una sini nga ginbuno ang kahagugma nga menor de edad. Nakita ni Nildo Llabore ang insidente kag nagtambag ini apang nabun-an man ini.
Nagpalapit man si Aiza agud buligan ang manghod apang ginbuno pa gid ini sang suspek. Bangud sang mga patal nga pilas tuga sang pagbuno sa lawas nanday Nildo Llabore kag Aiza Isuma, ginbawian ang mga ini sang kabuhi.
Samtang naghingyo sang pasaylo si Rogelio Salaya sa pamilya sang tatlo ka mga persona nga iya ginpangbuno. Ginpahayag sini nga indi sini hungod nga bun-on ang mga biktima. Suno diri nga indi siya makapati sa hitabo kag posible nga nadala lamang ini sa iya emosyon. Nakahanda man ini nga atubangon ang kaso batuk sa iya. Nahibaluan nga parolado ang amo nga persona kag bag-o lamang nga nakagwa sa presuhan matapos ginbpatay man sini ang iya karelasyon bangud sa pagpangimon.
