Davao City – Gitino ni Davao City Police Office (dcpo) Director PSSupt. Alexander Tagum nga dili hold-up ang nahitabo sa nag-viral nga Facebook post ni Ronald Julius Doromal bahin sa usa sa Japanese national nga gi-hold up matud pa samtang nagsakay og jeep inay usa kini ka pagpanglabni.
Subay kini sa gisaysay ni Doromal sa iyang Facebook post nga samtang sakay sila sa jeep padulong sa J. P. Laurel Avenue ning syudad sa Davao kasakay ang biktimang hapon, kalit nalang sumala pa nga mideklara og hold-up ang lima ka mga suspetsado nga gibana-banaang anaa sa 40 anyos ang pangidaron dayon kuha sa kwarta sa biktima.
Mukabat matod pa sa P8,000 ang salapi nga natangag sa mga suspetsado human sa pagpanglabni sulod sa jeepney.
Dugang ni Doromal, bisan paman nga gilabnihan na ang maong hapon nangayo pa kini og pasaylo sa iyang mga kakaubanan nga pasahero dayon tunol og kwarta alang sa ilang pamasahe apan wala nila kini dawata.
Sumala ni Tagum, nagpahigayon na og joint hot pursuit operation ang mga personahe sa San Pedro ug Sta. Ana Police Stations batok sa mga suspetsado human nga nakuhaan sila og CCTV footage.
Gani subling nagpasidaan ang DCPO Chief nga kanunay magmaigmaton panahon nga musakay og de pasaheroang sakyanan.
RadyoMaN Jason Amisola
