Pagadian City – Nisaka na sa walo ang gikatahong nakabsan samtang kritikal usab ang driver ug kapin 30 ka tawo ang kasamtangan nga gi-atiman sa mga doktor human nawad-an og preno ang pampasaheroang jeep nga gisakyan sa mga miyembro sa Pantawid Pamilyang Pilipino Program o 4Ps diin didto kini naligid sa Purok Bahada, Barangay Dao, Pagadian City.
Sa interview sa RMN Pagadian kang Cogonan Brgy. Captain Cerning Bicagas, gikan ang iyang mga konstitwente nga pulos 4Ps beneficiaries sa Sitio Glab Barangay Cogonan, Labangan sa probinsya sa Zamboanga del Sur paingon kini syudad sa Pagadian City aron mag-withdraw unta karong adlawa ilang monthly cash assistance.
Nasayran nga nawad-an og preno ang jeep sa bahada nga bahin sa kalsada rason nga nibangga sa ubang sakyanan hangtud nga miligid sa makatulo nga higayon ngadto sa kilid kalsada.
Gidapatan sa og tambal sa mga doctor ang mga samaran nga giadala sa Zamboanga del Sur Medical Center ug sa duha ka pribadong ospital.
Giila ang namatay nga sila Ernesto Guinican, Julieto Guinican, Tato Guinican, Junior Picay , Inda Bawan, Joy Guilingan,Julieta Guinican at Jelou Macatulad.
Sa nakuhang CCTV Footage sa RMN makita nga overloaded ang maong sakyan nga gimaneho ni Marlito Palaran.
