Davao City – Nigula sa imbestisyon sa Bureau of Fire Protection Davao nga electrical short circuit ang hinungdan sa sunog sa Sta. Veronica St., La Verna Hills Subdivision, Buhangin, Davao City pasado alas 6 sa gabie adlawng Martes.
Sa pakighinabi sa DXDC kang SFO1 Ulysses Cervantes, Fire Investigator sa Lanang Fire Station sa kusina sa balay ni Pastor Reisini Maraat nagsugod ang kalayo.
Pipila sa mga gilantaw ni Cervantes nga posibleng sa wirings o sa appliances nga nakasaksak hinungdan nga ni-spark ug nagdilaab kini.
Walay angol o nakalas nga kinabuhi sa insidente gawas nalang sa mga binuhing mga manok ug pabo sa pamilyang Maraat.
Naugdaw usab ang tanang kabtangan lakip na mga mahalon nga mga musical instruments.
Segun sa nahibiling usa sa mga anak ni Pastor Maraat nga si Angelica nga wala niya nga damha nga nakabangon siya gikan sa pagkatulog ug nakagawas sa nasunog nila nga balay.
“Pasalamat gyod ko sa Ginoo kay 4 hours nako natulog tungod sa kakapoy wala ko kamata sa dihang out of the blue nakamata ko nga si Lord gyod ang nag-saved sa ako kay ako ra bya usa balay namo unya ang room nga akong gitulugan duol ra sa kitchen kay kung wala ko nakamata sunog gyod ko ug dili ko kagawas ato kay dali ra kaayo nidako ang kalayo,” saysay niini sa Dxdc Reportorial team.
Mokantidad sa kapin P1M ang damyos sa sunog sa maong naasoy nga lugar diin napagan usab ang tapad nga balay sa pamilyang Maraat.
Pahinumdum sa BFP XI nga una muhawa sa mga panimalay i-check nga walay nahibiling nakasaksak o mamahimong palungon ang plangka aron dili kini mamahimong rason sa sunog.
RadyoMaN Aimee Guinita
