Davao City – Gikonsidera ni Barangay Lasang Barangay Captain Alan Simo-ag nga usa ka dakong oportunidad sa Davao City ang bagyong ‘Urduja’ nga nilampornas sa daghang lugar sa Eastern Samar ug sa Palawan area.
Segun ni Simo-ag, ang ‘Urduja’ nagpaaghat sa disaster managemen experts sa pagrebyu ug sa pagsusi sa disaster preparedness plan kun magamit ba kini panahong muigo sa dakbayan ang kalamidad sama sa bagyong ‘Urduja.’
Gisulti ni Simo-ag nga ang pinakamaayo nga disaster plan mao ang pagpalig-on sa matag barangay disaster risk management council sanglit sila ang anaa sa lugar ug sila usab dayon unang makaresponde ug pag-rescue sa katawhan nga maapektohan sa bagyo kun kalamidad nga muigo sa dakbayan sa dabaw.
Wala na gibutyag sa kapitan kun aduna ba’y kakulangon sa master plan ug disaster management ang dakbayan sarang magamit sa pagluwas sa mga tawo nga maipit sa kalamidad.
Buot ni Simo-ag nga ikonsidera sa lokal nga kagamhanan ang pagseguro sa episiyente nga kolaborasyon sa matag barangay ug sa lokal nga kagamhanan hilabi na sa mga lugar nga dili maabot sa Central 911.
Dugang sa kapitan nga angay usab i-hitsas sa kahibalo sa option ug Plan A ug B gamit ang disaster plan ang mga tawo sa mga barangay hilabi na nga walay nasayod sa gikusgon sa mga kalamidad nga musulod sa nasud partikular sa dakbayan sa Dabaw.
Ang pagkamatay sa 31 ka tawo ug pagkawala sa laing 49 ingon man ang minilyon ka pesos nga damyos gikan sa istraktura, agrikultura ug uban pa dayag nga kamatooran sa pagpaningil sa atong kinaiyahan nunot sa pagka-irisponsibli sa mga tawo.
Busa pagmata, pagpakabana, pagtanum og mga kahoy sa kabukiran samtang dili pa ulahi ang tanan mga kasama!
RadyoMaN Joel Viray
