Davao City- Nagpahimangno ang lokal nga gobyerno ngadto sa publiko partikularmente sa mga residente dinha sa Shrine Hills ug Diversion Road sa Barangay Langub atbang sa karaang dumpsite ning syudad sa Davao gumikan sa hulga sa landslide.
Dunay nakita nga mga cracks sa taas nga bahin sa bungtod ang head sa Disaster Risk Reduction and Management Center of Davao nga si Emmanuel Jaldon.
Sumala pa og matigayon ang landslide, maapektuhan ang highway ug delikado usab sa mga naga-agi nga mga motorista.
Gani duna nay aksyon ang lokal nga gobyerno kabahin sa maong sitwasyon diin girekomenda na ngadto sa City Engineer’s Office kun CEO ug DPWH nga magbutang og warning signs sa kadalanan alang sa safety sa mga motorista ug mga residente.
Gi-tambagan na sab ang tag-iya sa usa ka shop sa sakyanan nga undangon gilayon ang pagkalot sa slope walls diin posibleng maka-trigger kini sa landslides, samtang nag-isyu na og mga notice sa mga residente sa lugar ug nag-request na usab sa CEO nga mag isyu og ‘No Habitation Notice’ sa usa ka religious group nga nagpatukod og building sa taas sa bungtod.
RadyoMan Renz Barbarona
