Davao City – Nakahatag na og dakung kabalaka karon ang nahimong pag-alboroto sa tensyonadong relasyon tali sa Estados Unidos ug Islamic Republic of Iran human napatay ang usa ka hataas nga opisyal sa militar sa naulahi.
Sumala ni Prof. Clarita Carlos, political science professor sa University of the Philippines (UP) ug Executive Director sa Stratsearch Foundation, gihunahuna unta sa Amerika una gihimo ang assassination plot kontra kang Lt. Gen. Qassem Soleimani ilabi na kung unsay epekto niini tungod kay posibleng mamahimo lamang kining pabilo sa ikatulong gubat sa kalibutan.
Tungod niini, nanawagan si Carlos nga dili na sugnoran pa ang bangi karon tali sa Iran ug Amerika aron malikayan ang pagdaku pa sa buruka.
Gipasabot usab ni Carlos nga angayan gayud nga papaulion na nato ang mga Overseas Filipino Workers (OFWs) kinsa nanarbaho sa mga lugar nga apektado sa kasamok apan segurohon usab sa gobyerno sa Pilipinas nga aduna silay matrabahoan dinhi sa dihang mahiuli na gikan sa abroad.
RadyoMan Bernard Pantallon
