Davao City – Andam nga muuli ang usa ka Overseas Filipino Worker (OFW) sa Middle East ugaling ipatuman ang ‘repatriation’ kun pagpabalik nila sa Pilipinas ugaling mugrabe ang tensyon karon tali sa Iraq ug Estados Unidos.
Sa interbyu sa DXDC RMN Davao kang Celestial Myrth Restauro, taga Compostela, Davao de Oro, ug duha ka tuig nang nagtrabaho sa Abu Dhabi, United Arab Emirates (UAE), andam kining muuli sa Pilipinas ugaling imando, labi na alang sa ilang seguridad.
Segun ni Restauro nga bisan og normal pa ang sitwasyon sa UAE sa pagkakaron apan posible gihapon nga madamay kini labi na silingan lamang ang maong mga nasud.
“Boundary to boundary lang na’ng Kuwait, Saudi, diri sa UAE. So, duol lang gyud kaayo siya. It takes hours lang [ang travel] between sa mga boundaries,” saysay niini.
Samtang, gikabalaka usab sa inahan niini ang sitwasyon sa iyang anak sa Middle East ug buot usab niining papaulion ang anak ugaling dili na luwas kanila ang sitwasyon sa lugar.
RadyoMaN Kirby Manzon
