Anaa na sa kustodiya sa kapulisan sa Mabolo ning Syudad sa Sugbo ang gituohang suspek sa pagpatay sa usa ka babaye sud sa compound sa usa ka condo sa Brgy.Kasambagan ning dakbayan .
Balhog karon sa prisohan si Crisanto Martinez nga giingong ka live-in partner sa napalgang kalabera na nga si Josephine Ortega gikan sa usa ka kinawtan nga yuta sa compound sa usa ka condo .
Sa pakighinabi sa DYHP RMN CEBU kang Martinez, niangkon kini nga tiggamitan siya og ilegal nga drugas ingon man ang iyang ka live-in partner nga si Ortega apan nihimakak nga siya ang nagpatay sa biktima .
Nisaysay kini nga nasakpan niya si Ortega nga dunay laing kadug sa kama sud sa bunkhouse niini nga nahimutang lang sa compound sa condo .
Apan miinsister si Martinez nga giingong wa siyay gihimo ug siya pa ang nangayo’g pasaylo nga nakasamok siya sa duha .
Dugang ni Martinez nga nakita niya mismo ang gialegar nga paghikog ni Ortega gamit ang usa ka kutsilyo ug sa iyang pagtuo nga patay na kini, iya ra sab kining giguroy padung sa gawas ug gilubong sa giingong kinawtan na daan nga yuta ug iya pang gi-semento .
Basi sa inisyal nga imbestigasyon sa kapulisan, nakaangkon og mga samad-dinunggaban si Ortega sa iyang lawas .
Gituohan sab sa kapulisan nga selos ang hinungdan sa pagkamatay ni Ortega human miangkon ang gitumbok nga suspek nga naglagot ug nagselos siya dihang iyang nahibaw-an nga dunay lain si Ortega .
Bisan wa moangkon si Martinez nga siya ang nagpatay sa biktima, andam siyang moabutang sa posibleng kaso nga ipasaka batok kaniya .
