Dipolog City – Duha ka mga kinabuhi ang nakalas human masunog ang usa ka balay nga nahimotang sa may Purok Limbunga, Barangay Gulayon, dakbayan sa Dipolog nianang mga alas 12:45 tungang gabii.
Sumala pa sa taga BFP Dipolog nga apil sa nasunog ang tag-iya sa balay nga si Engr. Nesita “Bebe” Velasco, 64 anyos, lakip napaig ang iyang adopted daughter nga usa ka Angel, 11 anyos, samtang naluwas ang usa ka Lani Montallana hingkod ang edad, kinsa kapuyo sa biktima.
Sa imbestigasyon sa kabomberohan, nasayran nga ang nahisgotang balay gama sa mix materials kon diin ang kalayo diha nagsugod sa may sala hantud mikaylap sa kinatibuk-an bahin niini.
Gikataho nga si Montallana ang nakahimo paggawas didto agi sa bintana kwarto human giligwatan og kabra ang window grills sa nitabang nga kabanay apan si Engr. Velasco kuyog sa iyang adopted daughter ang natrap sa may kwarto ug naapil kini sa naugdaw nga balay.
Sa pakighinabi sa rmn news team sa nakaluwas sa sunog nga si Montallana gibutyag niini nga dunay gi-charge nga cell phone sa may sala, ayha pa sila nangatulog nga posibleng usa sa sinugdanan sa kalayo apan karon gisubay pa kini sa fire investigator.
Giisa sa 3nd alarm ang sunog nga gideklarar fire out ala 1:45 na sa kadlawon ug gibana-banang mokabat sa P150,000.00 mil ang inisyal nga danyos.
