Davao City- Nasikop sa kapulisan sa Sta. Ana PNP ang usa ka drug pusher human nakuhaan ug shabu atol sa gilusad nga buy bust operation ubos sa mando ni Sta. Ana PNP Station Commander Police Chief Inspector Nolan Raquid, natigayon alas 3:50 sa hapon didto sa Km. 11 Sasa Public Market ning dakbayan.
Ang dinakpan nailhan na si John Garcia Remus alias Long hair, 29 anyos nga ulitawo ug residente sa nasampit nga lugar.
Sa gihimong operasyon, si Police Officer 1 Esmalla ang nagtakuban as poseur buyer dala ang 500.00 ka pesos nga buy bust money kambiyo sa usa ka sachet nga shabu. Wala kabantay ang suspek gilayun giposasan sa kapulisan.
Narekober sa kapulisan gikan sa posisyon sa suspek ang upat ka sachet nga gituohan shabu lakip ang drug paraphernalia ug buy bust money.
Ang dinakpan tingkagol na sa selda Sta. Ana PNP samtang gihikay na sa kapulisan ang kasong kalapasan sa Akta Republika 9165 kun Comprehensive Dangerous Drug Act of 2002.
RadyoMan Don Pulayao
