Davao City- Sikop sa Sta. Ana PNP ang drug pusher human nakuhaan og shabu sa gipatuman nga search warrant kauban ang pwersa sa Criminal Investigation and Detection Group (CIDG) natigayun alas 7:00 sa gabii sa Brgy. 31-D Quezon Boulevard ning dakbayan.
Sa report gikan sa Sta. Ana PNP, naila ang suspek nga si Garry Escamila alyas Bunso, 19 anyos ug residente sa nasampit nga lugar.
Matud sa report, sa dihang girekisa ang panimalay sa suspek nakuha sa kapulisan sulod sa cabinet ang usa ka big square heat sealed transparent plastic sachet, duha ka small rectangular heat sealed transparent plastic sachet ug upat ka small square heat sealed transparent plastic sachet nga gituohan shabu. Nakompiska pod sa kapulisan ang .38 caliber revolver, duha ka plastic straw ug duha ka aluminum foil.
Ang dinakpan balhug na sa Sta. Ana PNP ug gihikay na sa kapulisan ang kasong kalapasan sa Republic Act 9165 kun Comprehensive Dangerous Drug Act of 2002.
Radyoman Don Pulayao
