Usa ka health center sa Davao City, gireklamo human giingong nibalibad og pasyente

Davao City- Gireklamo karon sa usa ka netizen ang Agdao Health Center human giingong gibalibaran siya sa mga empleyado atol sa pagpa-checkup niya sa anak.

Sa pakighinabi sa DXDC RMN Davao sa maong inahan, gibutyag niya nga daan na silang giingnan sa doctor nga pabalikon niadtong adlaw’ng lunes apan pag-abot nila alas onse sa buntag, gibalibaran kini sa isog nga paagi kay lagi matud pa cut-off na.

Dugang pa sa complainant nga grabe iyang panghangyo tungod 2-anyos nga bata ang pasyente pero wala siya panumbalinga ug igo rang gitalikdan.

“Gusto gyud nako ma-complain sila ma’am kay aron mausab ilang treatment sa mga pasyente nga naga pa-checkup sa ilang health center kay grabe sila ug mga batasan. Dili lang gyud ako ang naka-experience sa ilang mga Batasan, daghan gyud kaayo ma’am, ako lang ang nag reklamo kay dli nko tanggap nga gibalibaran nila akong anak.” segun sa inahan.

Hinuon, abri ang DXDC alang sa pagpaminaw sa pikas bahin aron usab mahatagan og katin-awan ang reklamo batok sa maong health center.

RadyoMaN Ivy Parido