Davao City- Gidala sa Southern Philippine Medical Center ang usa ka 62 anyos nga lalaki human gibokbok ug gibunalan pa gamit ang binugha nga kahoy alas 7:00 sa gabii natigayon sa Sitio Bakal Brgy. Leon Garcia ning dakbayan.
Sa report gikan sa Sta. Ana PNP, naila ang biktima nga si Rolando Latagan samtang ang suspek ginganlang Arnold Cerojano alyas Owak, pareho nagpuyo sa nasampit nga lugar
Matud pa sa report, samtang pauli ang biktima padulong sa iyang pinuy-anan, wala kini kabantay nga gisundan sa suspek ug didto kalit gikulata unya gipusposan pa og kahoy. Maayong pagkaigo sa iyang likod sa ulo nga bahin nga miresulta sa iyang pagkatumba ug pagkawala sa panimuot. Daling gitabang ang biktima ug gidala sa Southern Philippine Medical Center.
Nasuta matud pa ang motibo gumikan igo lamang nangutana ang biktima ngadto sa suspek kabahin sa utang.
Samtang ang biktima padayun pa gitambalan sa SPMC, ang kapulisan naghulat nalang sa kabanay sa biktima kun mopasaka ba og kaso batok sa suspek.
RadyoMan Don Pulayao
