Sa interview sa DXDC RMN Davao sa mga personahe sa Monkayo Public Information Office (PIO) ug Monkayo Municipal Risk Reduction and Management Office (MDRRMO), 7 ang nakabsan sa kinabuhi human matam-okan sa mga yutang midahili lakip na ang usa ka pamilyahan.
Giila ang mipanaw nga magtiayon nga mao sila Catherine ug Rommel Gumatin kauban ang ilang lima ka mga anak.
Natala usab ang duha ka mga critically injured nga mga bata nga nahimutang karon sa Monkayo Municipal Health Office.
Butyag sa mga otoridad nga giingong nag-prayer ang mga biktima ug giabusahan na daan nga mubakwit na apan naabtan gyud sila sa pagdahili sa yuta.
Nasayran usab nga naka-live video pa sa Facebook ang bana una ang insidente.
Post pa sa kapamilya ug kabanay sa mga biktima nga sakit man dawaton ang paagi sa ilang pagpanaw apan sila malipayon lang gihapon tungod matud pa mihawa sila sa kalibutan nga nangalagad sa Ginoo.
Sa pagkakaron usab, giangkon sa rescuers sa Monkayo nga naglisod sila sa ilang operasyon sa pagkalot ug pag-rescue sa uban pang mga biktima tungod sa padayong pagbundak sa ulan ug pagdahili sa yuta.
RadyoMaN Ivy Parido
