Kritikal ang usa ka sundalo nga anaa sa usa ka tambalanan dinhi sa siyudad, samtang samad, bun-og ug pangos sa kalawasan ang naangkon sa dose ka mga kauban niini, lakip unom ka mga CAFGU, human mahulog ang ilang gisakyan, pasado alas-6:00 kagabii sa usa ka pangpang sa Barangay Lanipao.
Gikan sa Barangay Kalilangan ang mga sundalo sa 41st company sa 4th Mechanized Infantry Battalion, pauli na unta sa ilang headquarters sa Barangay Rogongon dihang ma-aksidente kini.
Matud pa ni LtC. Domingo Dulay, commander sa 4th Mech, kauban ang mga sundalo sa gipahigayong People’s Day sa kagamhanang lokal didto sa Barangay Kalilangan.
Nagpahigayon, matud pag ang team og Community Support Program o CSP, isip kabahin sa Task Force to End Local Communist Armed Conflict o TF ELCAC.
Miingon si Dulay nga naulahi sila tungod kay sila ang nagbira sa kapin 30 ka mga sibilyan nga sakyanan lakip na mobile sa pulis tungod kay naglisod kini sa danlog nga dalan.
Nag-ulan sugod pa kagahapon sa buntag nga maoy nagpadanlog sa dalan nga posible matud pang maoy hinungdan sa pagka disgrasya sa mga sundalo.
Wala pay gipagawas sa media nga pangalan sa mga nadisgrasya tungod kay unahon pa pagpahibalo ang ilang mga pamilya sa nahitabo. (Divina M. Suson, March 7)
