Suma ni 10th ID Philippine Army Spokesperson Major Mark Anthony Tito nga 365 days na zero NPA ang area sa 1003rd Brigade ngadto sa mga dapit nga anaa sulod sa ilang operational field.
Segun ni Tito nga sukad napuhag sa 10TH ID ang mga guerrilla units sa Teroristang CPP NPA NDF ang pipila ka lungsod sa Davao Del Norte ug pipila ka barangay sa ikatulong distrito ning siyudad nga kanhi gikutahan sa mga komunista ug sa ilang mass base karon mingaw na.
Gibutyag ni Tito nga pipila sa mga lugar nga kanhi gihimoan og kampo sa teroristang CPP NPA NDF mao ang Paquibato area ug kasigbit nga barangay sa Davao City, Kapalong, Talaingod, Kapalong, Sto.tomas, Carmen nga pulos sakop sa probinsiya sa Davao del Norte.
Gibatbat pa sa tigpamaba nga dakong kawalan sa kalihokan ang pagkamatay ni Kumander Parago sa Pulang Bagani Command nga naglihokan sa Paquibato area aron pahinayon ang paglapad sa area sa mga NPA rehiyon onse.
Usa sa mga lungsod sa Davao del Norte kung asa dunay nagpatigbawbaw nga shadow government sa kontrolado sa Teroristang NPA apan karon malampuson nga napuhag sa kasundalohan.
Pipila sa mga dagkong grupo sa NPA nga nabungkag mao ang Front Committee ni Kumander Jasmine, Pulang Bagani Command, Front 33, ug daghan pang uban.
Aminado ang opisyal nga dakong hagit sa parte sa 1003rd Brigade Philippine Army ang pagmintinar sa “Zero Npa” ug kahapsay ug kalinaw sanglit dunay karon sa mga mag-uuma angay matubag sama sa produktong Abaca nga wala na mahalin karong panahona.
RadyoMaN Joel Viray
