Davao City- Gikumpirma ni Davao City Mayor Inday Sara Duterte Carpio nga aduna pay 1 ka missing atol sa nahitabong sunog sa NCCC Mall of Davao niadtong Disyembre 23 ning tuiga.
Sa media press briefing ganina, miingon si Mayor Duterte nga wala pa nakit-an ang usa ka SSI employee, gawas sa 37 ka mga patay’ng lawas nga una nang na recover sa awtoridad sulod sa maong mall.
“We continue to look for that one missing SSI person and we started this morning by Bureau of Fire going to NCCC and the City Government of Davao through CSSDO going to the house of the family of that one missing SSI employee,” segun ni Mayor Sara.
Hinuon matod sa mayor aduna pay usa ka unidentified body nga nagpabilin sa awtoridad sa pagkakaron ug gipailawom na sa DNA test aron masuta kung ang patay’ng lawas mao si Mikko Demafeliz o bin ba kaha si Alexandra Moreno.
Subay niini, gikumpirma usab ni Mayor Duterte nga adunay usa ka NCCC Mall employee ang namatay kinsa giila nga mao si Melvin Gaa, usa ka disaster response team sa NCCC.
Sa usa ka balita gikumpirma usab kini sa NCCC management, diin nasayran nga si Gaa gitabangan ang mga SSI employees nga makanaog sa exit ug sa dihang nakagawas na ang ubang employees ingon man ang lain pang 700 NCCC Mall personnel ug mga bisita sa maong mall, misaka pag usab si Melvin aron isalbar ang lain pang na trap sa maong building.
Sa pikas bahin gikanayon ni Mayor Inday nga nag istorya na sila sa NCCC management ug SSI kalabot sa mga assistance nga itunol nila ngadto sa pamilya.
Matod pa niya ang syudad ang mutubag sa mga galastohon gikan sa mall, ospital, funeral parlor hangtod sa sementeryo, gawas niini manghatag usab og cash assistance ang lokal nga panggamhanan ngadto sa mga tagtungod.
Ang SSI muhatag og cash assistance ug livelihood packages ngadto sa mga paryente uban ang Department of Labor and Employment. Samtang ang NCCC mall of Davao manghatag usab og cash assistance sa mga pamilya ug scholarship ngadto sa mga anak sa mga biktima sa maong sunog.
RadyoMaN Abi Bibera
