TACLOBAN CITY – Patay an usa nga lalaki matapos laslason an liog hini han iya la mismo kainom ha Brgy. Bool East, Culaba, Biliran kagab-i, August 25.
Subay ha report han Culaba PNP, ginkilala an biktima nga hi Eduardo Rosquitos, 30 anyos, usa nga construction worker ngan residente ha nasabi nga lugar.
Ginkilala naman an suspek nga hi Roger Paje, 48 anyos, usa nga chainsaw operator ngan residente ha nasabi nga lugar.
Nagawas ha imbistigasyon han mga otoridad, alas 8:00 pala han aga kakulop nagkatangka na an biktima ngan an suspek para magtagay upod an usa nira nga sangkay nga hi Edgardo Cañete.
Han magkahuhubog na, nahingaturog hi Eduardo ngan hi Edgardo pero an suspek pagnahuhubog nagigin bayolente.
Ginkuha ni Roger an chainsaw, ginpaandar ngan gin atake an nakaturog nga hi Eduardo ha liog ngan iba pa nga parte han iya lawas, resulta han iya pagkamatay.
Nakadalagan naman dayon paggawas han balay hi Edgardo.
Arestado naman an suspek nga yana paslak na ha Caluba PNP lock up cell ngan maatubang hin kaso nga murder.
Subay han source, nakamata an suspek ngan nahikalasan nga nakapaslak na hiya ha presuhan, diri daw hiya maaram han iya nabuhat nga krimen tungod han iya kahubugan.
