TACLOBAN CITY – Ginpusil an usa nga lalaki han diri pa makil-an nga mga suspek ha Sta Ana St., Poblacion, District 7 Burauen, Leyte yana nga kulop, September 14.
Subay ha report han Police Regional Office 8, ginkilala an biktima nga hi Jimmy Relador, may asawa, residente han District 4 han nasabi nga bungto.
Nagawas ha inisyal nga imbistigasyon han mga otoridad, natukdaw la an biktima ha kalsada han nasabi nga barangay han tigda la magpakita an mga suspek sakay han motorsiklo SKYGO.
Ginpusil hi Relador ha iya talikuran. Nagpaharurot dayon pahirayo ha crime scene an mga suspek.
Gindara dayon an biktima ha EVRMC para matambal.
Narekober ha crime scene an usa nga basyo han bala han caliber .45 nga pusil.
Nagpapadayon naman an imbistigasyon han mga otoridad.
