Usa nga public school teacher ginpamumusil, patay

TACLOBAN CITY – Ginpamumusil patay an usa nga public school teacher ha Matag-ob, Leyte kasangkulop, November 1

Subay ha report han Police Regional Office 8, ginkilala an biktima nga hi Vincent Olorvida, 32 anyos, may asawa, residente han Brgy. Mansalip han nasabi nga bungto.

Nagawas ha inisyal nga imbistigasyon han mga otoridad, magmamaneho na unta hi Olorvida han iya sarakyan han tigda nala nagpakita an suspek ngan ginpamumusil hi Olorvida. Aadto gihapon ha sakob han sarakyan an asawa hini ngan duha nga anak pero waray ini labti.


Nagpahagna an suspek tipakadto ha sitio Lipgong.

Narekober ha crime scene an magazine han .45 caliber nga pusil ngan unom (6) nga bala.

Nagpapadayon naman an imbistigasyon han mga otoridad.

Facebook Comments