Davao City – Usa patay samtang duha samaran sa tropa sa gobyerno sa nahitabong sunod-sunod nga engkwentro sa Lower Dalimdim, Naga, Laak, Comval, ingon man sa Binancian Camadi District, Asuncion ug Brgy. Sonlon, Asuncion, Davao del Norte kagahapong adlawa, Abril 29 ning tuiga.
Sa report gikan sa Police Regional Office kun PRO XI, giila ang namatay nga sundalo nga si Private First Class Arman Campos samtang ang duha ka naangol mao sila Private First Class Ruben Lambac Jr. ug Ralph Ryan Baldomar.
Matud pa nga na-engkwentro sa 2nd platoon, 60th Infantry Battallion Philippine Army ang wala pa matinong ihap sa mga gituohang miyembro sa New People’s Army kun NPA nga gituohang sakop sa Pulang Bagani Command 4, Sub-Regional Command, Southern Mindanao Regional Committee sa Lower Dalimdim, Naga, Laak, Comval diin gisundan sa laing engkwentro tali 1st platoon 71st IB sa Sitio Rizal, Binancian, Camadi District, Asuncion, Davao del Norte alas 3:42 sa hapon sa maong adlaw.
Dugang niini, pag abot sa alas 4:30 sa hapon, nagkaengkwentro usab ang 1st platoon 46th IB ug ang grupong NPA sa Brgy Sonlon, Asuncion, Davao del Norte.
Sa karon, padayon ang operasyon sa kasundaluhan sa nasangpit nga mga encounter sites.
RadyoMaN Renz Barbarona
