Davao City – Duha ka mga sakyanan ang nadisgrasya samtang laing duha pa ka behikulo ang napagan sa insidente sa Sitio Bugac, Barangay Suawan, Marilog District, Davao City kagahapon sa hapon (Mayo 19, 2021) nga miresulta sa kamatayon sa usa ka biktima.
Sa interbyu sa DXDC RMN Davao kang Police Staff Sergeant (PSSg) Larry Galarion, traffic investigator Marilog Police Station, giila ang biktima nga si Ryan Cabanero, 29 anyos, truck helper sa gimaneho ni Angelito Banlasan.
Saysay ni Galarion, kalit lang nawad-an sa brake ang wing van nga gimaneho ni Banlasan rason nga nabangaan niini ang likod sa gisundang laing wing van tungod sa kakusog sa impact naipit ang biktima ug miresulta sa iyang kamatayon.
“Kanang duha ka wing van nga forward ug elf, bale nadamay ra na sila kay naa man sila sa iyang kilid pod. Nagdagan pod na same direction kay 4 lanes man ang dalan. Ang alleged (reason) sa driver, nawad-an daw siya og brake,” sulti ni Galarion.
Padayon pa usab ang gihimong imbestigasyon, samtang gikustodiya na sa Marilog Police Station ang driver sa nakabangga nga sakyanan.
Pahinumdom sa awtoridad sa mga motorista nga kanunay’ng i-check ang sakyanan ug segurohon kining kondisyon una mobiyahe aron malikayan ang susamang insidente.
RadyoMaN Kirby Manzon
