Davao City- Mag-usa na ka tuig karong adlawa sukad gibombahan sa Maute group ang Roxas Night Market kung asa 15 ang patay ug laing kapin 70 ang samdan niadtong September 2, 2016.
Ang kahadlok nga gibati sa pamilyang Saiyon wala gihapon mahanaw hangtud karon human usa sa ilang sakop nga si Perlisa naapil og kasamad niadtong higayona.
Sumala ni Valerie Saiyon, igsuon sa biktima, hangtud karon bation gihapon sila og kalisang kung anaa sila sa gawas kay basin mamomba na pod ang mga terorista sa atong siyudad ug mataymingan sila.
Dako ang pasalamat sa pamilyang Saiyon sa Ginoo tungod kay nahatagan og ikaduhang kinabuhi sa kalibutan si Perlisa dili sama sa ubang mga kabanay nga nagbangutan tungod sa kalit pagpanaw sa ilang minahal sa kinabuhi.
Sumala ni Valerie, naningkamotan ang ilang pamilya nga makalabang sa maot nga kasinatian sa pamomba sa mga terorista nga halos gikamatay ni Perlisa niadtong higayona.
Sigun ni Valerie, usa ang ilang pamilya nga nag-atang sa kalamboan sa kaso uban sa paglaum nga ilang maangkon ang hustisya ug madugta sa presohan ang lima ka sakop sa teroristang maute group nga na-kapansak sa Davao City Jail karon.
Sa katapusan,gipaambit ni Valerie Saiyon ang iyang tambag ngadto sa publiko nga magbinantayon ug mag-igmat kung anaa sa tapok sa bagang duot sa katawhan aron dili mapagan sa mga terorista sama sa nadangatan sa iyang igsoon nga si Perlisa sa miaging tuig.
Kasamang Joel Viray
