Muling nabuhay ang talakayan tungkol sa impeachment case laban kay Vice President Sara Duterte sa gitna ng deliberasyon para sa budget ng judiciary.
Sa debate sa plenaryo, kinwestyon ni Senator Jinggoy Estrada si Senator Kiko Pangilinan, sponsor ng judiciary budget, kung naninindigan ba ito na mas mataas ang Korte Suprema kumpara sa Senate impeachment court.
Matatandaang nagbotohan ang impeachment court sa desisyon ng SC na unconstitutional ang inihaing impeachment case laban kay VP Duterte dahilan kaya ini-archive ito ng Senado.
Tugon ni Pangilinan, maituturing itong novel legal question at legal argument, pero sa kanyang tingin mas mataas ang impeachment court kumpara sa Supreme Court dahil maaaring mapatalsik ng impeachment court ang isang nakaupong Supreme Court justice na nahaharap sa impeachment cases.
Dagdag pa ni Pangilinan, mayroong sole power ang impeachment court na litisin at desisyunan ang mga impeachment cases pero tutol naman dito si Estrada dahil para sa kanya ay “sui generis” o unique ang impeachment court at ang Supreme Court ang pinakamataas sa lahat ng korte.
Pero nang kunin naman ang panig ng judiciary, tumanggi silang magkomento dahil may hinihintay pang desisyon sa motion for reconsideration sa impeachment case laban kay VP Sara.
