Usbaw sa suholan sa mga Jo’s sa dakbayan ipahatag ni Mayor Uy

28

Dipolog City-Isip sayong pamasko alang sa tanang mga job order nga mga kawani sa kagamhanang lokal sa Dipolog, gimando na ni Mayor Darel Dexter T. Uy ang pagpatuman sa bag-ong usbaw sa suholan alang kanila sugod ning bulan sa Disyembre, ning tuiga.

Mao kini ang nasayran nga inpormasyon gikan sa buhatan sa mayor ning dabakyan sayo ning semahana.

Kining maong kalamboan ang nakahatag ug dakong kalipay sa tanang mga hingtundan gumikan kay makadugang kini sa ilang inadlaw nga kita, diin taud-taod na nilang gipangadoy, nunot sa pagsaka sa presyo sa mga palaliton karon.

Sigun sa nasayran nga kining maong kalamboan ang gihimo aron sa paghatag ug bili sa ordinansa no. 18-284 o nailang “Ordinance Establishing a Graduated Wage Rate Scheme for Job Order Workers in the City of Dipolog.”

Ilawom ning nasangpti nga ordinansa, adunay upat (4) ka mga grupo ang milangkob nga nagtakda ug mga taripa sa usbaw sa suholan, nga gilangkoban sa: Group A- nga nagbaton sa suholan nga P370.00 ka pesos, diin ang mga kawani ilawom niini mao kadtong mga adunay abilidad nga gikinahanglan sa ilang trabaho, nakatapos sa kursong bokisyonal, o naktungha sa kolehiyo, ug kadtong nagbaton ug mga national certificates (NC) o certificate of competency (CC).

Samtang ilawom sa Group B, makadawat kini sa suholan nga P450 ka pesos, alang sa mga kawani nga naghawid ug mga bachelor’s degree, nakatapos sa upat ka tuig nga kurso, nakatrabaho sa kagamhanang lokal sulod sa siyam (9) ka tuig ug nakapasar sa Sub-Professional Civil Service Career Examination.

Ilawom usab sa Group C, aduna kini suholan nga P500 ka pesos, alang sa mga kawani nga nakapasar sa bisan unsang Board Examinations, o sa Career Service Professional Examination ug kadtong nagbaton sa talagsaong abilidad nga adunay sertipikasyon gikan sa ilang gitrabaho-ang ahensiya, samtang ilawom usab sa Group D, nga nagbaton sa suholan nga P450.00 ka pesos, alang sa mga miyembro sa Special Cafgu Active Auxlliary (SCAA), CDRRMO, Street Sweepers, Sanitation Aides (garbage collectors), Traffic Management Officers, Sanitation Officers ug mga kawani nagserbisyo sa buhatan sa Building Official.

Sumala pa kining maong pagmando ni Mayor Darel Dexter T. Uy, nga ipatuman ang bag-ong usbaw sa suholan, ang iyang gihimo isip sayong pahalipay ug pamasko alang usab sa tanang mga Job Order nga mga kawani, sanglit nga sila tipik usab sa kinatibuk-ang kusog sa tanang mga kawani nga naghugpong sa pagtrabaho alang sa dakbayan nga nakatabang usab sa kagamhanang lokal sa pag-angkon ug lokal ug nasudnong mga pasidungog nga nakatampo sa pagpa-usbaw sa morale sa tanang mga katawhang Dipolognon.(CO-alb)

Facebook Comments