Davao City – Kinahanglang tutukan sa Davao City ang pagprepara sa mga ospital para sa mga critical ug severe cases sa COVID-19.
Gitinguha ni Department of Health Undersecretary Leopoldo Vega atol sa interview sa DXDC RMN Davao nga walay surge nga mahitabo sa dakbayan ug mamentenar ang double digits sa mga kaso.
Apan kung musutoy man ang mga kaso tungod sa holiday season, angay kining pangandaman.
“Kuntahay muabot gyod ang panahon nga mag-surge sa Davao, dapat lang ang hospitals ready gyud ug may capacity to address critical ug severe COVID cases kay kini ang kritikal. Ang atong mga hospitals makahatag og maayong access ug maayong kalidad nga pagbantay sa mga critical ug severe cases,” sumala ni Vega.
Giesplekar ni Vega nga ang taas nga kaso sa Davao, murepleka usab sa kadako sa populasyon sa dakbayan ug lakip pa niini nga daghan ang testing centers sa syudad aron sa paspas nga pag-detect sa mga infected sa maong sakit.
Segun ni Vega, gipaningkamutan karon sa DOH ug lokal nga panggamhanan ang pagkontrola sa ihap sa kaso apan hugot nga gipanawagan niini sa katawhan nga ang public health usa ka shared responsibility diin mag-agad kini sa behavior kun lihok sa mga tao.
RadyoMaN Aimee Guinita
