Davao City – Gikumpiska sa mga personahe sa Land Transportation Office kun LTO XI ang mga speakers gikan sa ubay-ubay nga mga jeep o mas nailhang “uso” dinhi sa syudad sa Davao.
Sa interview sa DXDC RMN Davao sa LTO XI, moabot sa 14 ka mga uso jeep ang nakumpiskahan og mga speakers atol sa gipahigayong opperasyon kagahapon sa Roxas avenue ug sa Ulas ning dakbayan diin asa sagad naga torno ang mga jeep nga adunay routang pa Toril ug pa Mintal.
Matud sa LTO XI, nga niadtong miaging tuig pa nila gipahimangnuan ang mga drivers nga dili magpakusog sa ilang sounds atol sa pagbyahe apan daghan gihapon ang wala misunod niini hinungdan nga daghan ang nadakpan.
Dugang pa nga ubay-ubay ang nagareklamo sa ilang opisina tungod dili magkasinabtanay og ting bayad ingon man dili dayon makanaog sa jeep gumikan dili makadungog ang driver dala sa kakusog sa sounds.
Apan sumala sa buhatan nga bisan adunay reklamo o wala, hugot gihapon ang pagpahimangno nila ngadto sa mga PUJ drivers nga musunod sa balaod dili lang ingon kay masilotan kundi alang usab sa ilang seguridad ilabi na sa mga pasahero.
Justin Togonon, UIC intern
