Davao City – Nanawagan si regional chairman sa Ulama League of the Philippines Ustadz Mahmoud Adilao ngadto kang Presidente Rodrigo Duterte ug Davao City Mayor Inday Sara Duterte-Carpio nga hatagan og pagtagad kung asa papuy-on ang mga apektadong residente sa nadayon nga demolisyon sa Brgy 26-C ning syudad sa Davao kagahapong adlawa, May 7, 2018.
Kagahapon, nahinayon na ang demolisyon sa nasangpit nga Brgy. bisan sila mihangyo nga human na nalang sa Ramadan himuon ang demolisyon.
Sa kasamtangang anaa sa Brgy. hall ug mga madrasa sa Brgy 23-C nagpondo ang mga apektadong residente.
Sa pikas bahin, wala nauyunan ni Ustadz Adilao ang pamaagi sa pagsecure sa demolisyon kagahapon.
Sumala niya, dili na angay pa harangan ang Brgy. sa 23-C, putlan og kuryente ug palibutan og mga militar ang kabalayan tungod wala ma kini labot sa demolisyon.
Hinuon kalma ra ang mga residente kagahapon human nga gisugdan na ang demolisyon sa nasangpit nga Brgy.
RadyoMaN Renz Barbarona
