TACLOBAN CITY – Nanhatag hin barato an usa ha mga nagdaog han P1.18 Billion pesos Ultra-Lotto 6/58 nga taga Borongan City, Eastern Samar.
Nag-ala santa claus hiya ha iya mga katrabaho hadi ha City Government han Borongan matapos tagan niya hin tag P5,000 pesos an mga ini.
An jackpot winner in aada na ha sakto nga pangidaron in lumakat na ha Borongan City upod an iya pamilya matapos makuha an iya premyo ha Philippine Charity Sweepstakes Office (PCSO).
Nanhatag gihapon hiya hin pamasko nga P1,500 kada usa ngadto ha mga tricycle drivers.
Sumala han usa nga staff ha City Hall han Borongan, haros 1,000 nga regular ngan casual workers an nakatagamtam hin P5,000 kada usa nga ginpaagi ha City Treasurer’s Office.
Gindapara daw an kwarta ha usa nga sangkay han jackpot winner ngan iginhatag ha treasurer’s office kun diin kapot han nasabi nga opisina an mga ngaran han empleyado han City Hall.
Early Christmas bonus para ha mga empleyado han City Government ngan ha mga tricycle drivers.
Nagpapasalamat hira ha ira sangkay nga waray mangalimot ha ira bis pa man multi-millionaire na ini.
Lumakat ha Borongan City an jackpot winner para han iya seguridad pati na ha iya pamilya.
Nagkakantidad hin P4.5 Million an ginhatag nga barato han buotan nga Ultra Lotto 6/58 Winner.
Basi han impormasyon nga nakarawat han rmn, gintagan gihapon niya hin million pesos an iya mga kabugtuan pati na an mga asawa hini.
Mahihinumduman nga dida han Oktubre nadaugan an ultra-lotto jacpot prize ngan nagtunga hira han usa liwat nga nagdaog nga taga Bicol.
