Davao City – Dakung uyon si Davao De Oro Governor Jayvee Tyron Uy sa subling pagpukaw ni Pres. Rodrigo Duterte sa silot-kamatayon sa nasud atol sa iyang ika-upat nga State of the Nation Address kun SONA.
Ang pagpabor sa gobernador sa death penalty pinasikad kini sa padayon nga operasyon sa sindikato sa iligal nga droga ug kurapsyon sa kagamhanan.
Daku’g ikatabang ang capital punishment sa pagkunhod sa krimen ug pagpitol sa mga pinili nga mga opisyal nga daw linta nga kun makapilit, supsopon gayod taman ang buhis sa katawhan.
Kumpiyansa si Uy nga walay pilion ang balaud-kamatayon basta makahimo gani og heinous crime, kurapsiyon ug droga, siguradong pahamtangan gayod niini bisan og datu pa kini o pobre.
Upat ka senador ang nagduso og lahi-lahi nga bersiyon sa silot kamatayon: Sila si Senate President Tito Sotto III kinsa buot niini nga maapil ang high-level traffickers sa capital punishment, samtang drug trafficking ug heinous crime usab ang gusto ni Senador Ronald Dela Rosa nga silotan og kamatayon.
Bugtong si Senador Bong Go ang may kagustohan nga hukman og kamatayon ang mga kurakot sa nasud diin sila Senador Panfilo Lacson ug Senador Manny Pacquiao nagduso usab og ilang kaugalingong bersyon.
Wala pa man hingpit masugdi ang debate sa death penalty, ang mga sakop sa oposisyon ug ang pipila ka kaalyado sa administrasyon nagpadayag na og pagsupak sa capital punishment.
Busa nakita na daan karon ni Sotto ang makalilisang nga debate tali sa uyon ug supak nga mahibalik pag-usab ang death penalty nga una nang naka-survive sa third ug final reading sa nakalabay nga 17th Congress.
RadyoMaN Joel Viray
