Davao City – Maayo ang investment schemes hilabi na kun nagtanyag kini og dagko nga tubo gikan sa gibubo nga capital kay maghatag kini og oportunidad sa mga kabus nga mahaw-as sa kalisdanan ug maharuhay ang ilang kahimtang.
Nagtoo si Compostela Valley Provincial Governor Tyrone Uy nga nakatabang ang investment scheme sa kalisod sa mga tawo karon kay daghan sa mga nagpait kaniadto apan karon kaharuhay na ang pagpuyo sukad nag-invest.
Matud ni Uy, importanteng ma-comply sa mga investment schemes ang mga rekwisitos aron adunay regulasyon ang gobyerno sa pagpadagan sa iskema ug dili matawag nga illegal ang operasyon sa investment.
Bentaha kun regulated ug kontrolado sa gobyerno ang mga financial institutions gawas nga proteksiyon kini sa mga tawo makakuha pa gyod og buhis ang gobyerno, matud ni Uy.
Dako’g risgo ang mga investments nga dili lehitimo ug wala marekognisar sa mga buhatan sa kagamhanan kay walay gukod ang mga tawo kun mayabo ang pundo ug mahunong ang operasyon sa iskema.
Hinoon wala gitino sa gobernador kun pabor ba kini o dili sa legalisasyon nga gitingoha ni Congressman Manuel Zamora sa COMVAL apan gi-awhag niini ang mga tag-iya sa investments nga himoong legal ang ilang operasyon pinaagi sa pagcomply sa mga rekwisitos sa gobyerno.
RadyoMaN Joel Viray
