Nagkurog pa nga mitaho sa kapulisan sa Godod si Jonalyn Danlas Andolong mga alas 9:00PM niadtong adlawng martes tungod sa nahitabong pagpanigbis sa ilang dapit didto sa may Sitio Pigis, Pob. Godod sakop ning atong probinsya sa Zamboanga del norte.
Mitaho si Jonalyn sa mga tinugyanan sa balaod tungod kay ang iyang live in partner nga si Ariel Motong Tulawa, 39 anyos , usa ka rubber tapper ang gitigbas kini mga alas 7:00PM kapin kun kulang.
Matod pa nga gitigbas kini sa iyang pag-umangkon nga nailang si Jhony Motong Tulawa, 23 anyos, ulitawo usa ka rubber collector ug residente kini sa Brgy. Gatas, sakop sa lungsod sa Kalawit. Gitigbas niya ang biktima gamit ang usa ka mahait nga sanggot.
Sa pagresponde sa kapulisan sa maong lungsod gipangunahan ni SPO3 Robinson M. Barcelo didto ilang nakita nga nagbay-ad ang biktima nga naligo sa iyang kaugalingong dugo. Dali kining gidala sa pinakaduol nga balay tambalanan alang sa hinanaling medikasyon.
Samtang mga 10:30PM sa susamang petsa malampuson nila nga nasikop ang suspek nga si Jhony didto banda sa siot nga dapit.
Anaa na karon gibalhog sa balay bilangguan ang suspek samtang nagpaabot sa kasong ipasaka batok kaniya.
Hinungdan sa maong insidente personal nga panagbangi matod pa.
